Leioaztarrek Aurrekontu Irekien bidez garatuko diren proiektuak aukeratu dituzte

Aurrekontu Irekien prozesuari esker, 2022an garatzeko bost proiektuen aukeraketa egin dute leioaztarrek. Parte hartu duten 1.264 herritarrek, besteak beste, komun publikoak, zuhaitzak landatzea eta garbigune mugikorra aukeratu dituzte.

Udalak amaitutzat eman du 2022ko Aurrekontu Irekien prozesua. Azaldu dutenez, hirugarren urtez jarraian, leioaztarrek euren udalerriaren etorkizunaz erabaki ahal izan dute, hobekuntzari begira, zer gastatu eta zer inbertitu datorren urteari begira, hain zuzen ere.

Guztira, 1.264 pertsonek parte hartu dute aurrekontuen bi faseetan. Bigarren fasean, proiektuak bozkatzeko 975 leioaztarren botoak jaso dituzte; horietatik, 45 prestakuntza-saioetakoak izan dira, 199 postontzietan, 163 karpetan eta 568 Leioa Zabalik Gardentasun Atariaren bidez.

Honako hauek dira aukeratutako proiektuak:

  1. Komun publikoak udalerrian zehar.
  2. Arboladia handiagoa udalerriko hainbat eremutan.
  3. Garbigune mugikorra jartzea auzoetan hondakin txikiak biltzeko.
  4. Umeentzako parkea estaltzen jarraitzea udalerriko eremu guztietan.
  5. Umeentzako jolasgune berriak jartzea Leioandin, Torresolon eta Pinosolon.

Udalak adierazi duenez, COVID-19aren pandemiak udal-aurrekontuen exekuzioan eragina izan duen arren, parte hartze prozesuari eutsi diote, eta, horretarako, 900.000 euroko partida mantendu dute.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun