Leioako Udaltzaingoak tabernari bat atxilotu du lan egiten zuen lokalean estupefazienteak saltzea egotzita. Taberna zigilatuta dago eta, hori miatzean, balantza bat, ebakitzeko elementuak, bilgarriak eta bezeroen izen-abizenak, kopuruak eta kostuak jasotzen zituen zerrenda zehatz bat konfiskatu dituzte, iturriek zehaztu dutenez.
Pinueta auzoko Nafarroa eta Maiatzaren Bata kaleetako egoiliarrek ohartarazita, udaltzainek zaintza berezia jarri dute azken asteotan inguru horretan estupefazienteak saltzen ziren edo ez egiaztatzeko. Hala, poliziak egindako ikerketan egiaztatu ahal izan da jendea taberna batean sartu-irtenean zegoela etengabe, horretan denbora gutxi eginez.
Kontuak hala, beharrezko egiaztapenak egin ondoren, operatibo bati ekin eta udaltzainak lokalera sartu ziren. Horretan, kokaina izan zitekeen hauts zuridun dosiak eta haxixa atzeman zituzten. Konfiskatutako gainerako elementuez gain, iturriek nabarmendu dute tabernako hozkailuak, izotz-makina eta kafe-makina itzalita zeudela eta garagardoa botatzekoa ez zegoela erabilgarri. Hala, bertako langilea atxilo eraman zuten udaltzainek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
