Igor Legarretaren "Ilargi Guztiak" filma Montrealgo Fantasia International Film Festivalean lehiatuko da

Zuzendari lioaztarra pelikularen filmaketan. © Nico de Assas

Iparraldeko Amerikako nazioarteko fantasia zinema-jaialdi garrantzitsuak Ilargi guztiak euskarazko pelikula sartu du bere egitarauan; hala, jaialdian parte hartzen duen euskarazko lehen filma izango da. Igor Legarreta leioaztarraren zuzendaritzapean egon dira Itziar Ituño, Josean Bengoetxea eta Haizea Carneros aktoreak, besteak beste.

Iparraldeko Amerikako fantasia-zinemaren jaialdi garrantzitsuenaren ospea du Montrealgo (Kanada) Fantasia International Film Festivalak, eta bertan izango da Igor Legarreta zinema-zuzendariaren azken pelikula: Ilargi guztiak. Euskaraz ekoiztutako banpiroen istorio hau XIX. mendean kokatzen den drama da, Jon Sagalá gidoilariagaz batera idatzitakoa, eta Itziar Ituño, Josean Bengoetxea eta Haizea Carneros aktoreek interpretatuta.

Jaialdiaren antolatzaileek zera adierazi zuten pelikula aukeratu zutenean: "Zuzendariak maisuki erabiltzen ditu tradizio banpirikoaren printzipioak, bizitza eta heriotza, maitasuna eta bakardadea, debozioa eta intolerantzia jorratzen dituen barne-epopeia baterako oinarri gisa. Ezin hobeto egina, banpiroen zinemako onenen artean dago".

Fantasiazko pelikulentzako nazioarteko erakusleiho paregabe horretan parte hartzen duen lehen euskarazko pelikula  da. Hala ere ez da lehen pelikula euskalduna izango, 1997an Alex de la Iglesiaren El día de la bestia ere bertan proiektatu zutelako. Fantasia International Film Festivalaren 25. edizioa abuztuaren 5ean hasi zen, mundu osoko produkzioen emanaldiakaz.

 

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun