Leioako Iparragirre zeharkaleko auzoa inguratuko duen giza-katea osatzeko deialdia egin dute bihar, eguena, arratsaldeko 19:00etan. Las Vegaz bezala ezagutzen den auzoko herritarrek salatu dutenez, bertako bizi-baldintzak jasanezinak dira: kamioien joan-etorria egunez zein gauez, zabor kiratsa eta aldameneko janari azkarreko jatetxe baten usainak eta kea.
Ekimenaren bitartez, auzotarren asmoa da, halaber, udalerriko zaborrak biltzen dituen enpresaren aparkaleku mugikorra itxi dadila aldarrikatzea, eta, aldi berean, udal-arduradunei gogoraraztea Iparragirre zeharkalea Leioa ere badela.
Deialdia baliatuz, antolatzaileek leioaztar guztiak gonbidatu dituzte giza-katean parte hartzera, auzotarrek pairatzen duten egoera bertatik bertara ezagutu dezaten.