Udalerriko Hiri Antolamenduko Plan Orokorraren berrikuspena egiteko prozesua abiatu du Leioako Udalak, orain arte, indarrean egon den hirigintza-plana 1999koa baita. Udal-iturriek azaldu dutenez, udalerriaren antolamendua arautzen duen tresna nagusia da, hau da, Leioako lurzoru eta eraikin publiko zein pribatuen erabilerak antolatzen dituen tresnaren berrikuspena egingo dute, hain zuzen ere.
Adierazi dutenez, indarrean dagoen HAPOk 20 urte bete ditu, eta hori berrikustea beharrezkoa da, Leioako egungo egoerara egokitzeko. Era berean, nabarmendu dute horren zikloa amaitu dela eta planaren helburu nagusietako bat lortu dela: Leioako auzoak beren artean elkar-lotzea, bizitegi-hazkunde berriei esker, kalitatezko hiri-espazioak sortuz, babestutako etxebizitza-eskaintza handiagaz (ia eraikitakoaren erdia) eta berdegune handiakaz (17 m2 espazio libre eta berdegune baino zertxobait gehiago biztanleko lortu arte).
HAPOa berria lortzeko prozesua luzea izango dela iragarri dute, gutxi gorabehera bost urtekoa, eta, lehen faseetan, herritarren parte-hartzea "bereziki garrantzitsua" izango dela adierazi dute. Udalaren asmoa da HAPO berriak bizilagunen beharrei erantzutea, eta helburu horregaz hainbat ekintza egingo dituzte: prestakuntza-saioak, informazio hitzaldiak, erakusketak, aldizkariaren eta udalaren webgunearen bidezko zabalkundea...
Herritarren parte-hartzea bultzatzeko asmoagaz, 10ean eta 17an, eguaztenak biak, Danontzako Hirigintzari buruzko hitzaldi bi eskainiko ditu Udalak, Kultur Leioako auditorioan. Horien helburua da HAPOren esparru teknikoa modu erraz eta didaktikoan azaltzea, leioaztarrek errazago uler dezaten.
Bestalde, abenduan, herritarrek parte-hartzeko ekintza ugari hasiko dituzte, hurrengo hilabeteetan zehar luzatuko direnak, HAPOren diagnostiko-fasearen barruan.