Leioako Udalak, Lanbide-Euskal Enplegu Zerbitzuari esker, 18 pertsona kontratatuko ditu 2021eko Tokiko Enplegu Planaren esparruan. Programak hainbat jarduera-ildo ezartzen ditu enplegua sustatzeko; horrela, Leioako garapen sozioekonomikoa eta modernizazioa ekarriko duten proiektuak bultzatuko dituzte, udalerriko ardatz estrategikoak sustatzen dituzten bitartean.
"Auzoko laguntzaileak" proiektuaren bitartez, Leioako Udalak herritarren eskura jarriko ditu onura publikoko hainbat zerbitzu, hainbat gairi buruzko informazioa eta aholkularitza emateko eta udalerria benetako ongizate-estatua izateko behar diren baldintzetan egon dadin zaintzeko. Zehazki, 10 pertsona kontratatuko dituzte: auzoko lau laguntzaile, arotz bi eta lau margolari. Horrela, hiri-jagoleen talde horrek antzemandako gorabeherak arinago konpondu ahal izango dira, horretarako eratutako lan-brigadaren esku-hartzeari esker.
Bestalde, Leioako udalerriko ardatz estrategikoak indartzeko programarako, zortzi pertsona kontratatuko dituzte tokiko merkataritza dinamizatzeko, turismoa sustatzeko, ahultasun-egoeran dauden pertsonen autonomia eta ahalduntzea bultzatzeko, herritarren parte-hartzea sustatzeko, euskara dinamizatzeko eta artxiboak digitalizatzeko lan teknikoak egiteko.
Proiektu horien bidez, pertsonen enplegagarritasuna hobetzeaz gain, udalerriaren lehiakortasuna eta erakarpena bultzatu nahi dira, bizimodu atsegineko ingurune gisa eta herritarren eskura dauden zerbitzuekin.
Hautagaien aurre-hautaketa Lanbidek egingo du, deialdian ezarritako baldintzen arabera. Lanbiden datuak aldatu edo eguneratu nahi dituzten pertsonek Behargintzan edo Lanbideren bulegoetan egin ahal izango dute. Hala ere, informazio guztia webguneko lan-eskaintza publikoaren atalean edo Behargintza Leioan dago eskuragarri.