SOS Kurkudi plataformak batzar informatiboa eta mahai-ingurua antolatuko ditu eguenean, apirilaren 28an. Azaldu dutenez, Domingotarren komentu zaharreko lurzoru babestua birkalifikatu gura duen HAPO aldatzeko espedientearen egoerari buruz arituko dira. Bertan, Atucha S.L. enpresak bertan eraiki gura duten "megagimnasio pribatua" eta Leioa eta unibertsitatea elkartezko korridorearen proiektuak zein fasetan dauden zehaztuko dute. San Bartolome kultur aretoan egingo duten topaketan, Fernando Hevia arkitektoak argibideak emango ditu, besteak beste.
"Ez hankarik ez bururik" duen egitasmoa geldiarazteko oraindik dauden aukeren inguruan ere arituko dira, tartean, epaitegietara jotzeko zein aukera dagoen azalduko dute.
SOS Kurkudi plataformak, San Bartolome eta Artatzagane eta Auzotarrok kultur elkarteak antolatutako ekitaldira joan eta "arazoaz jabetzeko" gonbidapena egin diete leioaztarrei, "informatuz, iritzia emanez eta lagunduz egitasmoa geldiarazteko".
