Leioan sexu-indarkeriari aurre egiteko herritarren inplikazioa bilatu gura du Udalak uda honetako jaietan. Gizartearen kontzientzia areagotu gura dute alor horretan, eta, horretarako, besteak beste, ekainaren 15ean, eguaztenean, prestakuntza-saio bat egingo dute eragile moreak izeneko figuren egitekoa azaltzeko. Tabernariek, jaietako kuadrillek, talde feministek, jai-elkarteek eta txosna batzordetako kideek parte hartuko dute sexu-erasoen eta eraso matxisten aurreko erantzuna hobetzeko eta koordinatzeko jarduera horretan.
Saioa arratsaldean izango da, 18:30etik 20:30era, Kultur Leioako osoko bilkura aretoan. Bertan, Udalak herritarrak eragile more gisa parte hartzera animatuko ditu, sexu-indarkeriaren aurkako eragile aktiboak bihur daitezen. Edukiera-kontuak eta bertaratzen diren guztien beharrak kontuan hartu ahal izateko, komenigarritzat jo dute aldez aurretik izena ematea; horretarako, leioaberdintasuna@gmail.com posta elektronikoaren bidez harremanetan jartzeko eskatu dute.