Euskaraz dakiten eta erabilera areagotu gura duten familientzako tailerrak antolatuko ditu Leioako Udaleko Euskara zerbitzuak. Zehazki, 4 eta 8 urte bitarteko umeak dituzten familia euskaldun eta mistoei zuzenduta daude (gurasoetariko batek euskaraz dakienean), hilean behin Kultur Leioan eta beste behin Pinuetako ludotekan izango dira tailerrak.
Helburua familia barruan zein familia artean hizkuntza-ohituretan eragitea da euskararen erabilera bultzatzeko eta harreman-sareak ehuntzea. Beraz, tailerrak euskara hutsean izango dira eta horietako parte hartzaileek ezinbestean euskaraz egin beharko dute.
Itzalekin kontu kontari du izenburu hurrengo tailerrak, azaroaren 5ean Pinuetako ludotekan izango da, 11:30ean, eta azaroaren 11n kultur Leioan, 17:30ean.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!