Gizon bat atxilotu dute Leioako etxebizitza batean lapurreta egiteagatik

Ertzaintzako polizia-agenteak, artxiboko irudian. © SEGURTASUN SAILA

Ertzaintzak 28 urteko gizon bat atxilotu zuen barikuan, azaroaren 18an, Bilbon, Leioako etxebizitza batean lapurreta baten ustezko egile bezala. Atxilotua etxe bateko bigarren solairura sartu zen fatxadatik eskalatzen eta, ihes egiten saiatu zenean, horretatik salto egin zuen eta laban bategaz mehatxatu zituen geldiarazten saiatu ziren bizilagunak, baita horietako bat zauritu ere. Atxilotuak polizia-aurrekari ugari ditu eta daborduko epailearen esku dago.

Eusko Jaurlaritzako Segurtasun Sailak jakinarazi duenez, lapurreta urriaren bukaeran jazo zen, Leioako etxebizitza batean. Etxeko bizilaguna etxetik kanpo zegoela baliatuta, lapurrak fatxada eskalatu eta leiho batetik sartu zen. Bizilagun bat gertatzen ari zenaz ohartu zen eta etxeko jabea abisatu zuen.

Jabea hainbat bizilagunegaz bertaratu zen, eta lapurretaren egilea ustekabean harrapatu zuten. Horren aurrean, ustezko lapurrak bigarren solairutik kalera egin zuen salto, zauri nabarmenik egin gabe. Orduan, bertan zeuden auzotarrek inguratu zuten, ihes egin ez zezan, baina atxilotuak labana bategaz mehatxatu zituen eta bizilagunetako bat eskuan zauritu zuen.

Azkenean, atxilotuak ihes egitea lortu zuen, seguruenik inplikatutako beste pertsona baten laguntzari esker, litekeena da lapurreta egin zuen gaztearen zain ibilgailu bat egotea, Segurtasun Sailak adierazi duenez. Izan ere, Ertzaintzari abisua eman ondoren, bertaratutako agenteek ingurua miatu zuten, baina ez zuten ihes egindako ustezko egilea aurkitu.

Egindako ikerketek eta gertakarien lekuko izan ziren bizilagunek emandako informazioak ustezko egilea identifikatzea ahalbidetu zieten agenteei, eta bariku arratsaldeko lehen orduan atxilotu zuten haren etxean, Bilbon. Hainbat polizia-aurrekari dituen atxilotua, epailearen esku jarri zuten zapatu goizean.

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun