Bonuak NANeko 120 eurora arte erosi ahal izango dira, eta aurtengo edizioan muga horri eutsiko diote: kopuru horretara arte erosi dutenek ezin izango dute bonu gehiago erosi, bai, ordea, lehen sortan erosi ezin izan zutenek. Orain arte, 72 negozio atxiki zaizkio kanpainari, eta oraindik ere deialdia zabalik dago batu gura diren establezimendu berrientzat.
Gogoratu dute bi bonu mota egongo direla: 10 euroko bonua, erosketetarako bost euro estra lortzeko, eta 20 euroko bonua, erosketetarako 10 euroko aparteko hobariagaz. Era berean, Leioa Indartu bonu horiek elkarren artean metatu daitezke, faktura bakoitzeko bi bonu arte, eta ezin dira eskudiruagaz trukatu. Bonuak beren zenbatekoaren berdinak edo handiagoak diren erosketetarako balio du. 2023ko urtarrilaren 31ra arte izango dira baliozkoak.
Parte hartzen duten 72 negozioek identifikazio-kartela izango dute establezimenduko leku ikusgarri batean, denak 10 langile baino gutxiagokoak eta eremu askotakoak, hala nola ile-apaindegiak, dekorazioa, jangaiak, farmaziak, moda eta ostalaritza.
Iban Rodriguez Etxebarria alkatearen hitzetan: "Horrela, lehen partida ekonomikoaren arrakasta luzatu nahi dugu; alde batetik, erosi ezin izan zuten pertsona gehiagok parte hartu ahal izan dezaten ekimen honetan, eta, bestetik, gure tokiko merkataritza indartu dezan, bere hurbiltasunarekin eta kalitatearekin gure bizi-sarearen funtsezko zatia baita udalerri gisa".