Guztira 12 pertsona kontratatu dituzte: lau auzoko laguntzaile, hiru zurgintzako ofizial eta lau margolari. Horrela, auzoko laguntzaileak izena duen taldeko kideek antzemandako gorabeherak arinago konpondu ahal izango dituztela iragarri dute, horretarako eratutako lan-brigadaren esku-hartzeari esker.
Auzoko Laguntzaileak proiektuaren bidez, Leioako Udalak herritarren eskura jarri gura ditu erabilera publikoko hainbat zerbitzu, batez ere, hainbat arlotan informazioa eta aholkularitza emateko eta udalerria benetako ongizate-estatua izateko behar diren baldintzetan egon dadin zaintzeko.
Bestalde, Leioako udalerriko ardatz estrategikoak sustatzeko programarako zazpi pertsona kontratatu dituzte tokiko merkataritza dinamizatzeko lan teknikoak egiteko (1), egoera ahulean dauden pertsonen autonomia eta ahalduntzea bultzatzeko laguntza emateko (2), herritarren parte-hartzea (1), artxiboak digitalizatzeko lanak (1), euskara dinamizatzeko lanak (1) eta informazio geografikoko sistemetan espezialista izateko (1).
Lanbide - Euskal Enplegu Zerbitzuak 262.499,80 euroko diru-laguntza eman zion Udalari pertsona horiek kontratatzeko, zeinak Leioako langabeak eta Lanbide-Euskal Enplegu Zerbitzuan izena emanda daudenak. Kontratuen iraupena sei hilabetekoa da, abenduaren amaieran hasi eta 2023ko ekainera arte.