Hamar horiek bat egin dute lehendik Berdintasun, Justizia eta Gizarte Politiketako Sailagaz batera sarea bultzatzen zuten 16 udalerriakaz: Bizkaitik Leioa, Zornotza, Bakio, Balmaseda, Bilbo, Derio, Durango, Erandio, Ermua, Galdakao, Gatika, Larrabetzu eta Sopuerta;eta Gipuzkoatik Arrasate, Tolosa eta Zumaia.
Nerea Melgosa, Eusko Jaurlaritzako Berdintasun, Justizia eta Gizarte Politiketako sailburuak, eta Iban Rodriguez, Leioako alkateak, Lakuan bat-egitea eszenifikatu dute, arestian aipatutako udalerri horien ordezkaritza instituzionalari ongietorria emateko. Bertan, Leioa gai horretan udalerri aitzindarietako bat dela azpimarratu zuten eta Rodriguezek kideen aurrean bere udalerrian eman dituzten aurrerapausoak azaldu ditu.
Halaber, Melgosa sailburuak honen garrantzia azpimarratu zuen: "haurrak eta nerabeak subjektuak dira, jada ez dira babesaren onuradun bakarrik, eskubideen defentsan subjektu aktiboak ere badira, adinaren eta garapen-mailaren arabera. HaurEkinek eskubide hori gauzatzea bilatzen du. Euskal erakundeok haur eta nerabeak beren eskubideen titular aitortzen ditugula adierazten duen beste froga bat da".
20 urte
Leioak 20 urte baino gehiago daramatza umeek eta nerabeek parte hartzeko mekanismoak sustatzeko lanean, Herrigune Leioaren bitartez, besteak beste. Rodriguezek adierazi zuenez, Herrigune Leioa proiektuak "tokiko politika hobetzen lagundu du, eta 1,50 zentimetrora iristen ez diren pertsona horien ikuspegitik begiratzen lagundu digu".
Horrela, tokiko mailan hainbat organo egonkor ezartzeko zenbait gidaritza martxan jarri eta Euskal Herriko Unibertsitatea, Innobasque edo UNICEF bezalako beste eragile batzuekaz eta udal ugarirekin lankidetza izan ondoren, Melgosak zuzentzen duen sailak Haurren Hirien Sarea proiektua HaurEkinen, Haurren Hiri eta Herrien Euskal Sarean, txertatu zuen. Orain HaurEkin Eusko Jaurlaritzaren Familia eta Haurren Zuzendaritzaren menpe dago.