EAJk eta PSE-EEk gobernu-akordioa berritu dute Leioan, eta datozen lau urteetarako gobernu-programa ezarri dute. Azpimarratu dutenez, programa horren lehentasuna pertsonen beharrei erantzutea izango da.
Halaber, agintaldi hau Leioa Erandiotik banandu zeneko bosgarren mendeurrenaren ospakizunak markatuko du, eta testuinguru horretan, gobernu berriak erronka garrantzitsuak izango dituela iragarri dute: Gizarte-zerbitzuak indartzea, Torresolo kiroldegia amaitzea, HAPO berria, Lamiako-Txopoetak eraberritzea, berdeguneak zabaltzea herritarrek erabiltzeko eta gozatzeko, lejoan Busako trazadura hobetzea, institutua udalerriaren erdigunean eraikitzea, La Avanzada estaltzea edo Emakumeen Herri Etxea sortzea, besteak beste.
“Agintalde honek ilusioz betetzen nau", nabarmendu du Iban Rodriguez agintaldia errepikatuko duen alkateak, "aurrekoan bultzatu genituen jarduera asko amaituta ikusiko ditugulako, eta jakina, agerian geratuko delako Leioa bizigarri, bideragarri eta bidezko baten aldeko apustua, eta batez ere, arrazoi gehiago izango ditugulako gure herriaz harro sentitzeko”.
Bestalde, Juan Carlos Martinez bozeramaile sozialistak adierazi duenez, “itun honek egonkortasuna emango dio udalari beste lau urtez eta hori funtsezkoa da herritarrek benetan eskatzen dituzten politikak egin ahal izateko”.
Orotara, horrela geratuko da gobernu-taldea: Etibaliz Bilbao (EAJ) izango da Lehen alkateordea, Pilar Grados (PSE-EE) bigarren alkateordea eta Mikel Abascal (EAJ) hirugarren alkateordea.
Leioako PSE-EEk honako arlo hauek kudeatzen jarraituko du: Gizarte Politikak, Gizarteratzea, Adinekoak, Osasuna eta Garapenerako Lankidetzarako arloa; Berdintasun arloa eta Enplegu, Ekonomia Sustapen, Merkataritza eta Turismo arloa.
Halaber, leioako EAJ-PNVk gainerako arloak kudeatuko ditu, Hezkuntza barne eta auzo eta Nagusie-etxeen gaineko erantzukizunak. Datozen lau urteetarako Agintaldi Plana urte amaierarako eginda egongo dela ere iragarri dute.