Ibilbide gidatuak egingo dituzte Leioako Arboretuma ezagutzeko

Erredakzioa 2023ko ira. 19a, 14:59
EHUko ikertzaileek bisita gidatuak eskainiko dituzte Leioako Arboretuma ezagutzeko. © LEIOAKO UDALA

Urte honetako Ondarearen Europako Jardunaldien esparruan, Leioako Udalak Arboretuma ezagutzeko irteera eskainiko ditu EHUko adituen gidaritzapean. Oinez egingo dituzte, urriko lau domeketan, goizeko 10:30etik 13:030era.

Europako Batzordeak antolatutako eta Bizkaiko Foru Aldundiak koordinatu ekimen hau kultur ondare immaterialari eskainita dago bereziki, eta horren barruan, proposamenetako bat da Naturarekin eta Unibertsoarekin lotutako ezagutzak eta erabilerak izeneko proposamena. Horren barruan kokatzen da, hain zuzen ere Leioako Arboretuma ezagutzeko ibilbide berdea.

Irteera Sakoneta kiroldegiko eta udaletxeko haritzetan hasiko da, Sarrienako artetik eta Horoskopoko parketik pasatuko da, eta Arboretumak eskaintzen duen biodibertsitate begetalean murgiltzeko aukera eskainiko du, bost kontinenteetako zuhaitz eta landareak ikusteko.

Udal-iturriek azaldu dutenez, zuhaitzak ez dira soilik botanikaren aztergaia; sakon errotuta baitaude inguruko kulturan, espiritualtasunean, historian eta ekonomian, besteak beste. Ikuspegi anitz horretatik abiatuta, Euskal Herriko Unibertsitateko Zientzia eta Teknologia Fakultateko eta Nakusarbe Elkarteko ikertzaileek emango dituzte azalpenak.

Parte hartzeko beharrezkoa izango da Bizkaiko Foru Aldundiak eskainitako webgune honetan izena ematea, agendan sartuz. Eguneko 20 plaza egongo dira eta urriaren 8ko bisita familiei zuzenduta egongo da, azalpen errazagoakaz, euskaraz zein gaztelaniaz; 15ean eta 22an gaztelaniaz izango dira eta 29an, euskaraz. Informazio gehiagorako deitu 946 072 576 telefono-zenbakira.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun