Elene Uribe da emakumezkoen pala-txapelketako antolatzaileetako bat, eta kontatu duenez, "ikusi genuen Atxikik eskualdeko gazte asko batzen zituela, eta emakumeok palara jokatzeko gunerik ez genuenez, txapelketa bat antolatzea bururatu zitzaigun". Pandemiaren ostean, binakako txapelketak antolatu zituztela gogoratu du Uribe palista leioaztarrak, baina aurten buruz buruko emakumeen lehen txapelketa antolatzea erabaki dute.
Aldiz, Eneko Uribe pilotari leioaztarra eskupilota-txapelketako antolatzaileetako bat da. Atxiki Pilota Elkarteko kidea ere bada, eta ekipo ofiziala izan beharrean, "lagun talde bat" diren arren, hainbat urte daramatzate Leioan pilota txapelketak antolatzen, tartean, aterpeko buruz buruko lehiaketeta. Aurten, 60 jokalari inguru batu dituztela kontatu du.
"Momentuz ez daukagu Atxikikoek daukaten sare handi hori, 18 emakume gabiltza lehiaketan, eta orain ligaxka fasea ari gara jokatzen", azaldu du palista leioaztarrak.