Gertaera atzo, astelehena, goizaldean jazo zen Derion, banketxe bateko alarma-zentralitatik hauteman zutenean herriko kutxazainetako batean lapurreta egiten ari zirela. Eusko Jaurlaritzaren Segurtasun Sailak jakinarazi duenez, segurtasun-kamerek bi pertsona grabatu zituzten rotaflex bategaz banketxeko kutxazain automatikoetako bat zabaldu nahian, baina alarma aktibatzean, pertsona susmagarriek alde egin zuten.
Horren berri izan ondoren, Ertzaintzako agenteek ihes egindako autoa atzemateko operazioa abiatu zuen inguruko udalerrietako udaltzaingoakaz batera.
Segurtasun Sailak adierazi du Leioako Udaltzaingoak auto susmagarria geldiarazi zuela, eta bertan zihoazen lau bidariei jaisteko eskatu ziela ibilgailua miatu ahal izateko. Zehaztu dutenez, auto barruan agenteek diskoa oraindik beroa zuen rotaflex bat, bihurkin bat, palankaxka bat, eskularruak, ileordeak, kirol-oinetako pare batzuk, kasko bat, lexia pote bat, bi walkie-talkie, telefono mugikor bat eta ehizako sastakai bat aurkitu zituzten.
Gertaera oraindik ikertzen ari diren arren, Ertzaintzak Derioko kutxazain automatikoan egindako lapurreta-saiakeran lau pertsona horien inplikazioa egiaztatu zuen, eta indarra erabiliz lapurreta egitea leporatuta atxilotu zituen.
Gaineratu dutenez, atxilotuek era horretako egitateakaz erlazionatutako polizia-aurrekariak dituzte eta atxilotu bezain laster Ertzaintzaren egoitzara eraman zituzten dagozkion polizia-eginbideakaz hasteko. Lau Atxilotuak daborduko agintaritza judizialaren eskuetan daude Getxoko Guardiako Epaitegian.