Udalburuari bidalitako gutunean zera deitoratu dute bizilagunek: "Auzo hauentzat hain beharrezkoa den zerbitzu hau egoera penagarrian dago, denbora gehiago ematen du matxuratuta, zerbitzua ematen baino. Egunero gertatzen dira matxurak". Azaldu dutenez, ulertzen dute arazo teknikoak egon daitezkeela, baina beraien aburuz, "mantentze-lan teknikoak eskasak dira, ez dago garbiketa-zerbitzurik eta zaintza oso urria da, deus ez dela esateagatik".
Ohartarazi dutenez, igogailua motorrak, bizikletak, txakurrak edo orgak garraiatzeko erabiltzen dute askok, eta horrek zerbitzuaren erabilera desegokia eragiten duela uste dute askok. Gauzak horrela Udalari eskatu diote igogailuaren erabilera arautzea, eta zaintza- eta garbitze-lanak hobetzea. Horretarako, sinadura-bilketa ere abiatu zuten abenduaren 1ean, Martin tabernan.
Argitu dutenez, ez dakite Udalak zuzenean zerbitzua kudeatzen duen edo enpresa bat dagoen horren atzean, baina hala izatekotan, "enpresa arduraduna estutu beharko litzateke, arazo horiek konpon ditzan, Udalaren erantzukizuna izan aurretik", adierazi dute.