Basilio Astulez Kantikako zuzendariak Bilbo Hiria Irratiari azaldu dionez, "artistentzat Arriaga antzokian aritzea beti izaten da berezia, beraz, lan gogorra egiten gaude, ilusioz eta egunaren zain". Zuzendariak aurreratu duenez, "ez da kontzertu tradizional bat izango, sorpresaz eta umorez beteta egongo den emanaldia izango da".
Astulezek azaldu duenez, Dizdizka zeruan Kantikarentzat Donostiako Eva Ugalde konpositoreak idatzitako kanta baten izenburua da, beraz hori ere ez dute ausaz aukeratu. "Horrek zabalduko digu atea bereziki taldearentzat idatziak izan diren zenbait gabon-kantu plazaratzeko eta abesteko, beraz, betiko kantak agertuko dira, baina guretzat bereziki idatzitako beste hainbat kantu ere eskainiko ditugu, eta lehenengo aldiz entzun ahal izango diren hiru pieza ere izango dira programan", iragarri du.