Maiatzaren 17a 1990etik da Homofobia, Transfobia eta Bifobiaren aurkako Nazioarteko Eguna, OMEk homosexualitatea gaixotasunen zerrendatik kendu zuenetik, hain zuzen ere. Hala, Leioak erakusketa bat abiatu du "koloreak atera nahi dizkiegu..." lelopean, herritarren artean hausnarketa pizteko erasoei, herrialde batzuetan indarrean dagoen heriotza-zigorrari, intolerantziari eta desberdintasunari buruz.
Horretarako erakusketa herriko bi gunetan kokatuko dute: Langileria 202 eta Sabino Arana 54, maiatzaren 20tik uztailaren 1era arte. Kanpaina horrek ekainaren 28an, LGTBIQ+ Harrotasunaren Nazioarteko Egunean, mezu bera bidaltzeko eta kontzientziatzeko ere balioko duela azpimarratu dute udal-iturriek.
Kasu bietan, eta efemeride biak direla eta, Udalak Leioako gizartea gonbidatu gura du pertsonei sexu-orientazioagatik, identitateagatik edo genero-adierazpenagatik egiten zaizkien eraso fisiko, psikologiko, intelektual eta moralak hausnartzera, aldarrikatzera eta salatzera.
Programazioa
Maiatzaren 17an eta ekainaren 28an Leioako Udalak, Berdintasun arloaren bitartez, hainbat tailer garatuko ditu udalerriko ikastetxeetako ikasleakaz: batetik, ikasleei genero-ikuspegitik harreman afektibo-sexualei buruzko ekimenak gauzatuko dituzte LH, eta DBHko ikasleakaz, eta, bestetik, ikastetxeak ekimen baten eszenatokia izango dira, Artaza-Pinueta, Lamiako, Txomin Aresti, San Bartolome, Altzaga Ikastola, Barandiaran eta Laketeko egoitzetako patioetan dauden bankuak LGTBI koloreakaz margotuko dituztelako.
Halaber, maiatzaren 22an eta 23an Zinegoak jaialdiaren proiekzioak egingo dituzte, doan, Kultur Leioan, 19:00etan. Gainera, urtero legez, Udalaren eta Kultur Etxearen eraikinetan LGTBI bandera jarriko dute, Udalak aniztasunarekiko eta berdintasunarekiko duen konpromisoaren erakusgarri.
Horrez gain, Leioako Udalak 944 801 336 Aholkularitza Juridikoko Zerbitzua eskaintzen du behar duenarentzat eta sexu- eta genero-aniztasunagaz lotutako informaziorako; Eusko Jaurlaritzak ere bere zerbitzua du berdindu.bizkaia@gmail.com helbidearen edo 946 453 322 telefono-zenbakiaren bitartez.