Udalak 205.000 euroko partida ekonomiko bat erreserbatuko du datorren urteko Udal Aurrekontuetan, Leioako umeek Haurren Aurrekontu Irekien bidez aukeratutako lau proiektu horiek gauzatzeko. Ekintzak adingabeen hausnarketatik sortu direla azpimarratu du Udalak, eta beraiek egindako proposamenak dira, bizilagun guztien bizi-kalitatea eta ongizatea hobetzeko pentsatutakoak, batez ere adingabeena.
Haurren Aurrekontu Irekiak Leioako Umeen Kontseiluan antolatutako ekintzetako bat da, eta entzuteko eta benetan parte hartzeko bidea dela azpimarratu du Leioako Udalak, txikienek udalerriaren errealitateari eta udal-kudeaketari begira egiten dutena. Zehaztu dutenez, aurten, udalerriko 300 ume baino gehiagok parte hartu dute, iazko kopuruaren antzekoa.
Leioako Haurren Kontseiluak ikasturte honi amaiera eman zion aurreko astean, udalerriko alkate Iban Rodriguez Etxebarriagaz eta Herritarren Partaidetzarako eta Gobernu Irekiaren zinegotzi Julen Capetillogaz bilduta.
Kontseilua osatzen duten haurrek, ikasturtearen hasieran, onartu zuten Udalak abian jarritako erronka, umeek jolasari dagokionez dituzten eskubideak lantzeko, Leioa udalerri jolasgarriagoa izan dadin. Jolasaren bidez garatzeko eta hazteko gune egokiak eta aukera egokiak dituztenak. Horretarako, umeek hausnarketa eta ideia guztiak zabaldu eta helarazi gura izan dituzte eta horretarako, Udalagaz batera, jolasaren dekalogo bat garatuko dute, datozen hilabeteetan aurkeztuko dutena.
