Leioako Udalak, Lanbide-Euskal Enplegu Zerbitzuagaz lankidetzan, eta EAEko 2021-2027 EGIF Plus Programaren esparruan, langabezian dauden 16 eta 30 urte bitarteko zortzi gazte kontratatuko ditu. Programa hau Behargintzan garatuko dute eta horren helburua da gazte leioaztarrak enplegagarritasunerako eta lan-merkaturatzeko aukerak hobetzea eta erraztea, ikaskuntza eta esperientzia eskuratuz.
Guztira, zortzi lanpostu eskainiko dituzte, guztiak 12 hilabetekoak, eta lanaldia % 100ekoa izango da. Hauek dira bete beharreko lanpostuak: turismoko teknikaria, merkataritzako teknikaria, herritarren partaidetzako teknikaria, euskara-dinamizatzailea, gizarte-integratzaile bi, artxiboko teknikaria eta administrazio-teknikaria.
Baldintzak
Udaleko iturriek zehaztu dutenez, adinaren baldintza betetzeaz gain, hautagaiek enplegu-eskatzaile gisa eta Gazte Bermea Sistemaren Fitxategian izena emanda egon behar dute. Gainera, ezin izango dute programa honetan sartu joan den urtean bertan parte hartu dutenek edo Leioako Udalak 2023ko enplegua sustatzeko tokiko ekintzetarako laguntzen deialdian kontratatu dituenak.
Lehentasuna izango dute lanpostu bakoitzean eskatzen diren titulazioen gaineko baldintzak betetzen dituzten hautagaiek, Leioan bizi direnek, Diru-sarrerak Bermatzeko Errentaren edo Bizitzeko Gutxieneko Diru-sarreraren titularrak edo onuradunak direnek, edo 30 urte betetzetik gertuen daudenek.
Hautagaitzak Lanbideren bidez kudeatuko dira gaurtik aurrera, uztailak 5 barikua. Informazio guztia Lanbideren webgunean kontsultatu daiteke: www.lanbide.euskadi.eus.