Espainiako Txapelketako zilarrezko domina irabazi du Leioako Askartza waterpolo taldeak

Nahia Martinez Gondra 2024ko uzt. 11a, 11:11

Lehenengo aldia da euskal talde batek Espainiako waterpoloko finalean jokatzen duena. © ASKARTZA

Ekainaren 14tik 16ra Espainiako Alebinen Waterpolo Txapelketan lehiatu ziren Leioako Askartzako neskak. 12 urteko jokalariak finalera heldu eta gutxigatik urrearen zaporea dastatzeko aukera izan zuten, baina, azkenean, tamalez, Terrassaren kontra 9-8 galdu zuten. Halere, mugarri erabakigarri bat jarri dute leioaztarrek: euren entrenatzaile Isusko Arias Barrutiak nabarmendu bezala, lehenengo aldia da euskal talde batek Espainiako waterpoloko finalean jokatzen duena.

"Urrea oso gertu izan genuen", onartu du Arias Barrutiak. Izan ere, finaleko azken segundoan Terrasak egindako jaurtiketa bati esker lortu zuen garaipena. Hala ere, neskak "oso ondo" aritu zirela azpimarratu du, Kataluniako lehiakortasuna eta intentsitatea altua baita. "Urte osoan zehar, lan ikaragarria egin dute eta eurena da meritua", baieztatu du, harro.

Jokalariek 12 urte dituzte, Askartza ikastetxetik datoz eta waterpoloaz biziki gozatzen dute. Alabaina, oztopo handi bat dute: igerilekuak. "Ez dugu igeritokirik ondo entrenatzeko. Beraz, horren kontra ere jokatu behar dugu", deitoratu du entrenatzaileak. Horren eraginez, are meritu gehiagogaz baloratzen dituzte lortutako emaitza onak. "Lortutako lorpen hau berriro errepikatzea oso zaila izango da etorkizunean, beraz, txalotzekoa da".

Gainera, euren lorpenak hainbat hedabidetan izan duen eragina eskertu du Arias Barrutiak, garrantzitsua baita "waterpoloari bultzada emateko".

Kirolak Leioa

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!

Izan zaitez HIRUKAlagun