Eguazten goizean, Iban Rodriguez Etxebarria alkateak, Pilar Grados Gizarte Politiketako zinegotziak eta Udalbatzako beste ordezkari batzuek harrera egin zieten uda igarotzeko hiru adingabeei eta haien harrera-familiei. Topaketak haur horiei Leioan egonaldi zoriontsua opatzeko balio izan du eta familiei euren konpromiso eta eskuzabaltasunagatik eskerrak emateko, udalak zehaztu duenez.
Oporrak bakean programak helburu hauek ditu, besteak beste:
- Errefuxiatuen kanpalekuetako haur sahararrei aukera ematea bizi dituzten baldintza gogorretatik ateratzeko, eta basamortuko tenperatura altuetatik urruntzeko (udan 50 ºC-ra irits daitezke).
- Kanpalekuetan ezinezkoak diren azterketak eta tratamendu medikoak egitea, beharren arabera tratamendu desberdinak egiteko aukerak aztertuz.
- Beharrezko mantenugai-mailak berreskuratzeko aukera emango dien elikadura-oreka ematea.
- Duela 40 urte baino gehiagotik pairatzen duten arazoari buruz kontzientziatzea.
- Harreran zehar familia-loturak sortzea, kanpamenduetara itzultzen direnean iraungo dutenak (elikagaiak bidaltzea, botikak, familiei bisitak, eta abar).
Leioako Udalak urtero diru-laguntza baterako deialdia egiten du ume horiek beren jatorrizko lekuetatik Leioara egiten duten bidaiaren gastuak estaltzeko. "Saharar haurrek beren bizi-baldintzak eta bizi-kalitatea hobetzeko behar duten laguntzaren alde Udalak duen babesaren eta konpromisoaren beste adibide bat da", nabarmendu dute.