Udal-iturriek aurreratu dutenez, Laket Leioako Emakumeentzako Jabekuntza Eskolaren ikasturte honetako programaren helburu nagusia da emakumeen partaidetza soziala eta politikoa sustatzea, emakumeen ahalduntzearen bidez. Horretarako prestatu dituzten ikastaroetako izen-emateak irailaren 23tik urriaren 15era arte egongo dira zabalik, eta modu presentzialean egin ahal izango dira udaletxean, Gaztelubiden edo modu telematikoan udalaren webgunearen bidez. Plazak mugatuak dira eta zozketa bidez esleituko dira, Leioan erroldatutako emakumeei lehentasuna emanez.
Eskaintzak feminismoa, osasuna, sexualitatea, kulturartekotasuna eta autodefentsa bezalako gaiak jorratuko dituzten 30 saio, tailer eta ikastaro baino gehiago izango ditu, Irakurketa feministaren kluba, Antisorgailuek emakumeen osasunean duten eragina eta Matxosfera desmuntatuz bezalako jarduera nabarmenakaz. Gainera, haurtzaindegi-zerbitzua ere aurreikusi dute, aldez aurretik eskatuta, emakumeen parte-hartzea errazteko.
Sortu zenetik, Laketek udalerriko emakumeen ahalduntzearen alde lan egin du, eta 100 jarduera baino gehiago eskaini ditu bost urtetan zehar. Ikastaroak Mendibileko lokalean egiten dituzte, doakoak dira eta adin guztietako emakumeentzat daude zabalik, baita gazteentzat ere, bereziki haientzat diseinatutako tailerrakaz.