Osakidetzak gorozki-inkontinentziari buruzko hitzaldi informatibo bat antolatuko du leioaztar guztientzat irekita. Saio horren helburua egoera hori agerian jartzea izango da, izan ere, biztanleriaren % 5 eta % 12ri bitartean eragiten dio horrek. Egitasmo horren bitartez, lehen mailako arretako medikuari edo erizainari kontsulta egitera animatu gura dute jendea, tratamendua baitu eta nabarmen hobetu baitaiteke.
Gaitz horren inguruan dagoen tabua hausteko helburua duen hitzaldiak patologia hori goiz detektatzeko programa pilotu baten parte dela azaldu dute Osakideatzako iturriek. Hala, Osakidetza Leioako Osasun Zentroan ezartzen ari da hori, Uribe ESIren barruan. Programaren helburua da Lehen Mailako Atentziotik gorotz-inkontinentzia duten pazienteak identifikatzea eta haien bizi-kalitatea hobetzeko tratamendu egokia eskaintzea.
Ekitaldiak hiru hitzaldi nagusi izango ditu. Lehenik eta behin, ASIA elkarteko Maite Carrerasek eta Angels Rocak beren testigantzak partekatuko dituzte, egoera horrek eragindako pertsonak diren aldetik. Ondoren, Jone Capetillo Leioako Osasun Zentroko familia-medikuak programa pilotuaren funtzionamendua eta lehen mailako arretan dauden tratamendu-aukerak azalduko ditu. Azkenik, Aitor Landaluce, Urdulizko Ospitaleko zirujaua, pazienteak zoru pelbikora bideratzeaz eta inkontinentziak eguneroko bizitzan dituen ondorioez mintzatuko da.
Saioan zehar, gorotz-inkontinentziarako tratamenduak ere jorratuko dituzte. Adituek azpimarratu dute aukera eraginkorrena elikadura-ohiturak aldatzea dela, zuntz askoko dieta eta ur gehiago hartzea barne. Aldaketa horren ondoren hobekuntzarik ikusi ezean, pazienteak tratamendu espezializatuetara bidera daitezke, hala nola nerbio tibialaren estimulaziora edo, kasu batzuetan, kirurgiara.
