Leioa Waterpolok Liga Nazionaletan txapelketa abiatuko du zapatu honetan, 13:00etan, Madrilgo Colegio Brains taldearen aurka. Leioako taldea aldaketa gutxigaz joango da lehen norgehiagoka horretara, baina esanguratsuak, Uxue Hernandez kapitainaren irteerak markatuko baitu denboraldiaren hasiera. Bere hutsunea betetzeko, Leioak gazteen aldeko apustua egin du, Lucia Rios, Naia del Campo eta Aiora Unzeta, Askartzatik etorritako jokalariak, sartuz.
Denboraldi honetako helburu nagusia mailari eustea dela adierazi dute taldekoek, aurreko denboraldian Leioak salbazioa lortu baitzuen azken jardunaldian. Jon Lopez teknikariak uste du leioaztarrek aurreko ikasturtean lortutako esperientzia kapitalizatu ahal izango dutela eta, "denboraldian zehar errendimendua hobetu ahal izango dutela".
B taldean sartuta
Taldea sentsazio onakaz iritsiko da ligako debutera, duela gutxi Euskal Herriko Superkopan parte hartu eta gero. Iruña 9802 taldearen aurka 8-13 galdu bazuten ere, Sakonetako jokalariek joko ona erakutsi zuten, eta horrek aro berriari aurre egiteko konfiantza emango diela azpimarratu dute taldetik
Leioa Waterpolo B multzoan lehiatuko da ligako lehen fase honetan, eta Brains, CN Vallirana, CN Molins de Rei, CW Pontevedra, CW Turia, AR Rivas eta UE Horta izango ditu aurkari. Lehen fase hau itzuli bikoitzean jokatuko dute eta erabakigarria izango da, lehen lau sailkatuak Ohorezko Mailara igotzeko lehiatuko baitira, eta azken laurak bigarren fasean lehiatuko dira jaitsiera saihesteko.
Talde berrituagaz eta hazten jarraitzeko ilusioagaz, Leioa Waterpolok denboraldi honi ekingo dio bere emaitzak hobetzeko xedeagaz, mailari eusteaz gain, waterpolo nazionalaren panoraman ere paper garrantzitsua eskuratzeko ere.