Planak ekintza estrategikoak aurreikusten ditu Udalaren barneko eta kanpoko komunikazioan euskararen erabilera areagotzeko, besteak beste, euskararen ikaskuntza sustatzeko eta sentsibilizazio-ekimenak areagotzeko. Gainera, metodologia parte-hartzaileak ere landuko dituztela azaldu dute, hala nola Udalaren egoera linguistikoaren diagnostiko eguneratua egitea eta erabilera bermatzea; EUSLE metodologia ezartzea, hizkuntza-oztopoak gainditzeko tailerrak egitea eta udal-bileretan “Ahobizi/Belarriprest” formulak erabiltzea bezalako ekimenak garatzea eta hizkuntzen erabilerari buruzko irizpide ofizialak hedatzea eta betearaztea, kontratu eta diru-laguntzetan klausula linguistikoak txertatzea, eta euskaraz lan egiteko tresna praktikoak eskaintzea.
Ahalegin hori euskara biziberritzeko konpromiso zabalago baten barruan kokatzen dela azpimarratu dute Udal-iturriek, eta 2034ra arte Euskara Biziberritzeko eta Euskal Hiztunak Ahalduntzeko Esparru Estrategikoa (AROA) egitea ere barne hartzen du. Ibilbide-orri hori herritarren eta hainbat gizarte-eragileren parte-hartzearekin garatuko dutela ere azaldu dute.
Apustu horregaz, Leioako Udalak berretsi egiten du euskararekin duen konpromisoa, kohesio sozialerako eta nortasun kulturalerako elementu gisa, eta udalerrian sendotzea eta haztea bermatzen du.