Lehiaketa honetan interesa duten pertsona guztiek parte hartu ahal izango dute, adina eta bizilekua edozein dela ere. Parte-hartzaile bakoitzak proposamen bi aurkez ditzake gehienez, betiere originalak, argitaratu gabeak eta beste lehiaketa batzuetan saritu gabeak baldin badira. Teknika libre izango da, eta argazkigintza, ilustrazioa, pintura edo diseinu digitala erabili ahal izango dira, baina ezinbestekoa izango da Leioako jaiak islatzen duen elementuren bat izatea.
Horretarako, lan guztiek "Leioa" eta "San Juan Jaiak 2025" testua izan beharko dute, eta formatu digitalean (JPG edo PDF), euskarri fisiko batean (USB edo CD) edo eskaneatuta, aurkeztu ahal izango dira.
Lanak aurkezteko epea apirilaren 4ra arte egongo da zabalik, eta proposamenak Kultur Leioan aurkeztu beharko dira, lelo edo izenburu bategaz eta egilearen identifikaziorik gabe. Hautaketa-prozesuaren inpartzialtasuna bermatzeko, gutun-azal itxi batean eta lelo beraregaz, parte-hartzailearen datu pertsonalak, laburpen kurrikuluma eta obra originala eta argitaratu gabea dela egiaztatzen duen sinatutako adierazpena aurkeztu beharko dira.
Herri-bozketa
Kartel finalistak hautatzeko, arte, diseinu eta komunikazio arloko ordezkariek eta jaietako kuadrillen kideek osatutako epaimahai batek aukeratuko ditu bost kartel finalista. Emaitza apirilaren 14an jakinaraziko dute, eta apirilaren 15etik 25era bitartean herri-bozketa egingo dute. Hala, herritarrei gehien gustatu zaizkien hiru kartelen alde bozkatu ahal izango dute (3, 2 eta 1 puntu, hurrenez hurren), Kultur Leioaren webgunearen bidez edo erakusketan bertan aurrez aurre bozkatzeko aukera izango dute.
Kartel irabazlea maiatzaren 11n iragarriko dute, 19:00etan egingo den ekitaldian. Irabazleak 800 euroko saria jasoko ditu; gainera, aurkeztutako lan guztiak Kultur Leioako erakusketa batean egongo dira ikusgai ekainaren 12ra arte.
Deialdi honegaz, Leioako Udalak kulturarekiko eta herritarren parte-hartzearekiko konpromisoa berretsi gura du, talentu artistikoa sustatuz eta San Juan Jaietako irudi bisuala sendotuz. Horregatik, herritar guztiak animatu gura izan ditu ekimen honetan parte hartzera eta beren sormenagaz 2025eko jaien irudian laguntzera.
Informazio gehiago nahi izanez gero, lehiaketaren oinarriak lotura honen bitartez kontsultatu daitezke.