Iragarri dutenez, datozen hilabeteetan Ansio eta Ibarbengoako geltokietan bizikletetarako beste bi aparkaleku irekitzeko asmoa du BGPk, ibilgailuen aparkalekuak dauden lekuetan. Gerora, aparkalekuak Plentzia, Urduliz, Sopela, Algorta eta Etxebarrira ere zabaltzeko asmoa ere iragarri dute, baita Bilboko zenbait geltokitara ere.
Bizikleten aparkalekura sartzeko eta bertatik irteteko, Barik txartel pertsonalizatua eduki beharko da, azpiegituraren sarrera eta irteera guztiak erregistratu ahal izateko. Barruan, erabiltzaileek beren bizikleta edo patinetea giltzatuko dute, eta, garraio publikoa erabiltzen duten bitartean, bateriak kargatzeko aukera ere izango dute, horretarako prestatutako entxufeetan.
Halaber, arduradunek azaldu dute aparkalekua erabiltzeko, gutxienez bidaia bat egin beharko dela metroz. Azpiegituraren ordutegia Metro Bilbaok zerbitzua emateko ezarritako berbera izango dela ere zehaztu dute; hau da, ezin izango dira ibilgailuak ezarritako ordutegitik kanpo utzi edo jaso. Hasiera batean, doako zerbitzua izango da, hori ezagutzera eman arte, eta, ondoren, prezio sinbolikoa aplikatuko zaie erabiltzaileei.
Bizikleta edo patinetea aparkatzeko gehieneko denbora ondoz ondoko lau egunekoa izango da. Denbora hori igarotakoan, BGPk ibilgailua eraman ahal izango du, giltzarrapoa deuseztatu ondoren, aparkalekua libratu eta beste pertsona batzuek erabili ahal izan dezaten. 15 egun igarotzen badira jabeak ibilgailua erreklamatu gabe, irabazi-asmorik gabeko gizarte-erakunde bati emango diotela ere erantsi dute. Horrez gain, isunak edo zaintza-kostuak ezarri ahal izango dituzte azpiegitura behar ez bezala erabiltzeagatik.
Azkenik, azaldu dute bizikleten aparkalekuak Metro Bilbaoko Aginte Postuak eguneko 24 orduetan kontrolatzen dituen grabazio- eta bistaratze-kamerak izango dituela, bai eta interfonoak ere, behar izanez gero Erabiltzaileentzako Arreta Sistemagaz harremanetan jarri ahal izateko.