Programazio honek gazteen interesak hartuko ditu kontuan, teknologiatik eta gastronomiatik hasita, adierazpen artistikoagaz eta kirolagaz jarraituz. Aurreikusitako jarduerak honako hauek dira:
- Trapillozko sorkuntza tailerra: apirilaren 22an eta 24an, 17:00etatik 19:00etara. 12 eta 30 urte bitarteko leioaztarrei zuzendua. Bertan, koloretako trapilloagaz poltsa bat sortzen ikasiko dira parte-hartzaileak, kakorratz teknikaren bidez.
- Dronen tailerra: apirilaren 22an eta 24an, 11:00etatik 13:00etara. 12 eta 17 urte bitarteko gazteei zuzendutako ikastaro praktikoa. Dronen munduan sartzeko aukera izango dute, haiek maneiatzeko, maniobrak egiteko eta pilotaje-erronkei aurre egiteko ingurune seguru eta kontrolatu batean.
- Sukaldaritza goxo eta gazi tailerra: apirilaren 23an eta 25ean, 11:00etatik 13:00etara. Sukaldaritza-trebetasunak garatzeko aukera eskainiko du, errezeta ezberdinak prestatzeko, bai gazia bai goxoa. 12 eta 30 urte bitarteko gazteei zuzendua.
- Katiluak pertsonalizatzeko tailerra: apirilaren 25ean, 17:00etatik 18:30era. Parte-hartzaile bakoitzak bere katilua diseinatzeko eta pertsonalizatzeko aukera izango du teknika ezberdinak erabiliz.
- Fun Play Park Basaurira irteera: apirilaren 26an, 17:00etatik 21:00etara. 12 eta 17 urte bitarteko gazteentzat pentsatutako irteera, non tranpolinak, oztopo-zirkuituak eta abentura-guneak izango dituzten. Irristagaitz galtzerdiak eramatea derrigorrezkoa da.
- Mexikar sukaldaritza tailerra: apirilaren 27an, 17:00etatik 18:30era. Mexikoko sukaldaritza tradizionaleko ibilbide gastronomikoa egiteko aukera izango dute, kultura horretako errezeta eta zapore enblematikoakaz.
Jarduera guztiak Aterpe Leioa Gaztegunean egingo dituzte, baina plazak mugatuak izango dira, eta, horregatik, izena lehenbailehen ematea gomendatu dute Udaletik. Horretarako epea martxoaren 24tik apirilaren 3ra egongo da zabalik, eta modu bitan egin ahal izango da: gaztegunedigitala.blogspot.com webgunearen bidez edo Gaztegunean bertan, jardueren aurreko aste-akabuan.
Leioako Udalak gazteen aisialdi osasungarria eta hezitzailea sustatzeko konpromisoa berretsi du, eta, horregatik, gazte guztiak animatu gura ditu ekintza hauetan parte hartzera. Jarduera hauek ikaskuntza, sozializazioa eta aisialdi dibertigarria sustatzeko diseinatu dira, betiere ingurune seguruan eta parte-hartzailean.