Leioa Lagunkoia programaren barruan herritarrek parte hartzeko prozesu berri bat bultzatuko du Udalak

Ander Zarraga 2025ko mar. 31a, 22:46

Ekimenean parte hartzeko postontziak jarriko dituzte herriko adinekoen zentroetan, besteak beste. © LEIOAKO UDALA

Leioako Udalak parte-hartze prozesu berri bat abiatu du herritarrek udalerriari buruz duten iritzia ezagutzeko, Leioa Lagunkoia ekimenaren baitan. Adineko pertsonen ikuspegia eta haien beharrak udal-politiketan txertatzea da horren helburua.

Maiatzaren 5era bitartean, 16 urtetik gorako leioaztarrek ekimenean parte hartu ahal izango dute euren iritziak emanez. Inkestak paperean egin ahal izango da eta horiek uzteko postontziak eskuragarri egongo dira udalerriko adinekoen zentroetan, Andrak-en egoitzan eta anbulatorioan. Informazio-karteletan egongo den QR kode baten bidez ere sartu ahal izango da formularioan, modu telematikoan.

Horren bitartez, informazioa jasoko dute eremu hauetan: aire zabaleko parkeak eta inguruak, espaloiak eta kaleak, trafikoa eta seinaleak, herritarren segurtasuna, garraio publikoa, etxebizitza, gizarte-sarea eta komunitate-laguntza, boluntariotza eta asoziazionismoa, aisialdia, errespetua eta gizarteratzea, komunikazioa eta informazioa, bai eta gizarte- eta osasun-zerbitzuak ere Leioan.

Prozesu horren helburua herritarren ahotsa udal-diagnostikoan sartzea dela azpimarratu dute udal-iturriek, baita parte hartzeko gune bat sustatzea ere, bereziki adinekoentzat, udalerria hobetzeko eta euren beharretara egokitzeko. Lortutako emaitzetatik abiatuta, Leioako Lagunkoitasun Plana egingo dute, eta bertan zehaztuko dituzte antzemandako beharrei erantzuteko jardun-ildoak. Ondoren, planifikatutako ekintzak garatuko dituzte, eta prozesuaren, planaren eta ezarritako neurrien ebaluazioa egingo da.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun