Hitzarmenaren sinadura goizean egin da, eta bertan Leioako alkatea, Iban Rodriguez, eta UNICEF Euskadiko Batzordeko presidentea, Joseba Madariaga izan dira. Alkateak nahiz presidenteak lankidetza honek udalerriaren haurtzaroarekiko konpromisoa sendotzeko duen garrantzia adierazi dute.
Iban Rodriguez alkateak azpimarratu duenez, "hitzarmen hau sinatzeak aurrerapauso handia dakar gure udalerria inklusiboagoa eta herritarren ongizatearekin konprometituagoa bihurtzeko helburuan, bereziki gure haurrengan arreta jarriz. Leioa haurrek hazteko eta garatzeko leku segurua eta aukeraz betea izatea nahi dugu, haiek beren herritzat senti dezaten, haien beharrizan, kezkak eta desioetatik sortua”.
Joseba Madariaga presidenteak azpimarratu nahi izan du “haurrak eta nerabeak erdigunean jarriko dituen tokiko politika bat gauzatzea da modurik eraginkorrena beren ahalmen eta gaitasun guztien garapen osoa lortzeko. Horregatik, UNICEFen Haurren Hiri Lagun aitorpenak Leioako haurrak eta nerabeak herriko agente aktibo bihurtzeko bultzada izan nahi du, esan behar dutena entzun eta haien beharrizan eta ardurei erantzuna emateko.”
KONPROMISOAK
Haurren Hiri Lagunak zigilua lortzeko sinatutako hitzarmenak hainbat konpromiso ezartzen ditu, Leioan haurren eta nerabeen bizi-kalitatea hobetzeko helburuakaz jarraitzeko. Aurrera eramango diren ekintzen artean honako hauek nabarmentzen dira:
- Leioako Haur eta Nerabeen Egoeraren Diagnostikoa egitea, haien behar nagusiak eta dituzten erronkak identifikatzeko.
- Haur eta Nerabeentzako Tokiko Plana ezartzea, eskubideetan oinarritutako ikuspegiarekin eta adierazle zehatzen bidezko jarraipen-sistemagaz.
- Koordinazio-baliabideak eta egiturak jartzea, udalerriko haurren politiken zeharkakotasuna bermatzeko.
LEIOAKO UMEEN KONTSEILUA
Leioako haurren parte-hartzea sakon sustraituta dago, gainera Estatuko erreferenteetako bat da. Horrela, Leioako Umeen Kontseilua 2008an sortu zen, parte-hartzeari eta udal kudeaketari dagokion gune gisa, eta haurren presentzia eta eskubideak bermatzen ditu. Hasieran proiektu aitzindaria izan zen eta urteetan zehar beste udalerrientzat eredugarri bihurtu da.
Helburu nagusia haurren parte-hartzea benetan eta modu eraginkorrean sustatzea da, erabakietan parte hartuz eta Leioaren hobekuntzan lagunduz. Hau hezkuntza, politika eta gizarte esperientzia bat da, haurren parte-hartzea sustatzen duena erabakimen politiko lokalean eta kudeaketa-zentroetan, eta haurrak subjektu politiko gisa pentsatzeko aukera ematen du. Horrek helduei aukera ematen die komunikazio eta harreman forma berriak lantzeko, baita “Haurren Eskubideen” ikuspegia hausnartzeko eta sozializatzeko, umeen eta helduen arteko elkarrizketa etengabean.