Gizaker enpresak Leioako Udalaren enkarguz egindako inkestaren arabera, elkarrizketatu dituzten 600 leioaztarren artean % 35,6k 8ko puntuazioa eman dio udalerriari, eta batez besteko puntuazioa 7,87 izan da. Herritar gehienek (% 66,5) uste du udalerriak hobera egin duela azken urteotan. Udalerriak dituen arazo nagusiei dagokienez, aparkalekua, trafikoa, metroaren distantzia, garraio publikoaren falta eta kiroldegia azaltzen dira.
Inkestan parte hartu dutenen gehiengo zabalak uste du udalerria garbia (% 92,3), segurua (% 89,3) eta ingurumena zaintzen duela (% 79,7), baina 10etik 8k etxebizitza eskuratzeko zailtasunak daudela uste du.
Oro har, herritarrek ondo edo oso ondo baloratzen dituzte jasotzen dituzten udal-zerbitzuak, hala nola zabor-bilketa, kultura, herritarrentzako arreta edo kirola. Gainera, Udalaren jarduera ona (% 50,5) edo ez ona eta ez txarra (% 30,5) bezala kalifikatu dute gehienek, 6,46ko puntuazioa lortuz. Azken urteotan Udalak egindako esku-hartzerik aipagarrienen artean Avanzada lurperatzea (% 16,3), berdeguneak (% 11,5) edo parkeak (% 6,7) nabarmendu dituzte.
Politikariak
Leioako Udaleko alderdi politikoen artean EAJ da puntuaziorik altuena eta babes gehien jaso duena (5,97), EH Bildu (5,57) atzetik oso hurbil izanda; PSE-EE (4,85), Elkarrekin Podemos (4,50) eta PP (3,41) izan dira hurrengoak. Ildo horretan, elkarrizketatuen % 68,8k Iban Rodriguez Leioako alkatea ezagutzen du eta batez beste 6,64ko puntuazioa ematen diote. Aldiz, % 32,7k bakarrik ezagutzen du Mari Jose Peleteiro EH Bilduko bozeramaialea eta 6,46ko puntuazioa ematen diote.
Era berean, udal hauteskundeetako boto-asmoari dagokionez, EH Bilduk hiru puntu egin ditu gora 2023 eta 2025 artean, EAJk ia galtzen zuen bitartean, eta PSE-EE eta Elkarrekin Podemosek nabarmen egiten dute bera.