Akordioa Leioako alkate Iban Rodriguez Etxebarriak eta EHUko Bizkaiko Campuseko eta Komunikazioko errektoreorde Estitxu Garai Artetxek sinatu dute. Proiektuaren gidaritza Ana Rodriguez-Larrad irakaslearen esku egongo da, Ageing On Ikerketa Taldearen barruan, Euskampus Fundazioak bultzatutako Onko-On Misioaren esparruan.
Ikerketak ebaluazio-sistema berritzaile bat ezarriko du, parte-hartzaileak osasun-mailaren eta egoera fisikoaren arabera sailkatzeko. Hala, hiru hilabeteko programak diseinatuko dituzte, astean saio bi izango dituztenak, eta bizimodu aktiboari eusteko gomendioakaz osatuko dituztenak. Gainera, jarduera onkologikoan diharduten profesionalentzako prestakuntza ere jasoko du ekimenak, udal-baliabideak sendotuz eta programaren jarraipena bermatuz.
Zeregin horretan Leioako Udalak bere kirol-instalazioak eta Jarduera Fisikoko Orientazio Zerbitzua (SOAF) proiektuaren eskura jarriko ditu, eta tokiko osasun-zentroakaz koordinazioa indartuko du.
"Leioa bere bizitzako etapa guztietan eta aurre egin beharreko edozein egoeratan pertsonak zainduko dituen udalerria izatea nahi dugu. Ikerketa honek prozesu onkologiko bati aurre egiten diotenen bizi-kalitatea hobetzeko bide itxaropentsua irekitzen du", adierazi du Leioako alkateak.
Bere aldetik, Estitxu Garaik lankidetzak unibertsitateren jardunean duen garrantzia azpimarratu du: “Pertsonen eta komunitatearen ongizatean eragin zuzena izango du proiektu aitzindari honek eta guztiz bat dator komunitatearen zaintzarekiko unibertsitateak duen konpromisoarekin".