Leioako ingurune naturala eta historia uztartzen dituen hitzordu maiteenetakoa itzuliko da datorren urriaren 26an, domekan. Leioako Euskal Kirol Zaleak elkarteak, Udalaren laguntzagaz, 11. Hiru Ermitak Herri Ibilbidea antolatuko du, 15 kilometro baino gutxiagoko martxa zirkularra, herritar guztientzat egokia. Ibilaldia 09:00etan abiatuko da Boulevardko ikurrinatik, eta 11:30ak inguruan amaituko da txitxiburduntzi bategaz.
Aurten, ibilaldiak Leioaren 500. urteurrena izango du ardatz, eta ermita bakoitzean udalerriaren historiari lotutako jarduerak egingo dituzte. Gainera, parte-hartzaile guztiek aukera izango dute Leioa500 pack bereziak irabazteko, Udalaren merchandising eta oroigarri-materialakaz.
Ibilbideak Mendibile, Santsoena, Kurkudi, Zuhatzu, Altzaga eta Artatza bezalako guneak zeharkatuko ditu, eta Santimami, San Bartolome eta Ondiz ermitetatik igaroko da, udalerriko paisaia eta ondare kulturala omentzeko.
Leioako alkate Iban Rodriguezek nabarmendu duenez, "Hiru Ermiten Ibilbidea gure herriaren funtsa islatzen duen tradizio modernoa da: elkartuta dabilen herria, bere inguruneaz gozatzen duena eta bere historia baloratzen duena. Aurten, 500. urteurrena dela eta, urrats bakoitza omenaldi bat izango da Leioa posible egin dutenei".
