Zapatuan, otsailaren 14an, arrastiko 17:00etan hasiko dira Leioako Inauteriak Errekalde Plazan, haur eta gazteentzako puzgarri eta tailerrekaz. Egun horretan, 19:00etan, familientzako Dantza Saltsa animazio-ikuskizuna izango da Jose Ramon Aketxe Plazan. Ordutegi berean, Ibarretukada kalejirak Leioako kaleak zeharkatuko ditu, mozorro festa familiarrari hasiera emanez.
Gauean, helduek izango dute protagonismoa. 21:30ean, nagusientzako mozorroen jaia egingo da Ikea Barri Plazan, Eñaut-Eriak taldearen eta Aaron DJaren eskutik. Geroago, 23:00etan, Altxa Porru erromeriak hartuko du lekukoa, eta jaia goizaldeko 03:00ak arte luzatuko da.
Otsailaren 17an haurrentzako inauteriak ospatuko dira. Goizeko 11:00etan hasiko da haur parkea Txomin Arestiko karpan, eta 12:30ean Kiki Koko pailazoaren ikuskizuna egingo da. Arrastian, 17:00etan diskofesta egongo da. 18:00etan haurrentzako mozorro jaia egingo da, partaideen desfileagaz. Inauteriei amaiera emateko 19:00etan sari banaketa egingo da.