Lehiaketan parte hartu gura duten taldeek urtarrilaren 25era arte dute izena emateko aukera. Horretarako, Kultur Leioako harrerara jo daiteke edo infokultur@leioa.eus helbidera idatzi. Parte-hartzaile guztiek abesbatza amateurrak izan beharko dute, gutxienez 12 kidekoak, eta abesbatza profesionalak lehiaketatik kanpo geratuko dira.
Bi kategoria ezarri dira adinaren arabera. 16 urtera artekoek goizez egingo dituzte emanaldiak; 16 urtetik gorakoek, ostera, arrastiz. Abesbatzek 2 edo 3 abesti interpretatuko dituzte antolakuntzak zehaztutako lau eremuetan: Lamiako, Pinueta-Ibaiondo, Hirigunea eta San Bartolome-Artatzagane.
Epaimahaia musikako profesionalek eta musika koral zein tradizionaleko adituek osatuko dute; besteak beste, interpretazioaren kalitatea, talde-lana, jantziak eta emanaldien girotzea baloratuko dituzte.
Kategoria bakoitzean hiru sari banatuko dira: lehen saria 400 eurokoa izango da, bigarrena 300 eurokoa eta hirugarrena 200 eurokoa, guztiek garaikurra eta diploma jasoko dituztelarik. Horrez gain, parte hartzen duten talde guztiek 60 euroko dieta jasoko dute.
Sari banaketa otsailaren 7an izango da, zapatuan, eguerdiko 12:00etan, Kultur Leioako Erakusketa Aretoan.