Zentroa 2026-2027 ikasturtetik aurrera itxiko dute, eta sindikatuaren arabera, erabakiak eragin zuzena izango du bai langileen enpleguan, bai ikasle eta familien egunerokoan.
Sindikatutik adierazi dutenez, neurria "kolpe latza" da hezkuntza-komunitatearentzat, bereziki bertan lanean ari diren hamar bat langilerentzat. Gainera, langileek erabakiaren berri izan dute lekualdatze-lehiaketa amaitu ondoren, eta horrek, CCOOren esanetan, "segurtasun juridiko eta laboral falta larria" sortzen du, irakasleen eskubideak murriztuz.
Ikasleen egoerak ere kezka sortzen du. Gaur egun, 50 ikasle baino gehiago daude Lamiakoko Eskolan, eta haien familiek "denbora oso laburrean" beste ikastetxe bat bilatu beharko dute, informazio argirik gabe eta inprobisazio giroan. Sindikatuak salatu du erabakia matrikulazio kanpaina hasi aurreko aste gutxitan jakinarazi dela, eta ez direla bermatu harrera egingo duten zentroetako baldintzak; besteak beste, garraio eskolarik ez dago jada erreferentziazko ikastetxe publikoan.
CCOOren ustez, Lamiakoko Eskolaren itxiera ez da kasu isolatua, baizik eta eskola publikoari "modu sistematikoan" kalte egiten dion hezkuntza-politika baten parte. Politika horrek ziurgabetasuna, deserrotzea eta prekaritatea sortzen dituela ohartarazi dute, bai langileen artean bai hezkuntza publikoaren kalitatean.
Azkenik, sindikatuak iragarri du babesa eta aholkularitza emango diela kaltetutako langileei, ikasleei eta familiei. Gainera, Bizkaiko Hezkuntza Ordezkaritzari erabakia bertan behera uzteko eskatu dio , "sozialki eta hezkuntzaren ikuspegitik justifikaezina" delako.