Aitorpenaren banaketa Bilbon egin dute, EUDELen egoitzan, eta bertan izan dira Leioako alkatea eta beste hainbat udalerritako ordezkariak. Edizio honetan, Bilbo, Errenteria eta Urretxurekin batera lortu du zigilua Leioak; Tolosak, berriz, gobernantza onaren printzipioekiko konpromisoa berretsi du.
ELoGE zigilua eskuratzeko, udalek beren jardunbidea neurtu eta egiaztatu behar izan dute, Gobernu Onaren hamabi printzipioetan oinarritutako 72 adierazleren bidez. Besteak beste, giza eskubideak, etika publikoa, gardentasuna, herritarren parte-hartzea, segurtasun juridikoa eta epe luzerako plangintza aztertzen dira.
Leioak jada 2017an ere lortu zuen zigilu bera, eta alkatearen esanetan, “sariak udalaren jarduna erreferentziazko eredu gisa finkatzen du” gobernantza onean, kalitate demokratikoan eta erantzukizunean oinarritutako kudeaketa publikoan. Halaber, azpimarratu du tokiko mailatik ere posible dela gobernu-ekintza moderno eta eraginkorra gidatzea, herritarrak politika publikoen erdigunean jarrita.
ELoGE programaren sei edizioetan, Euskadiko 25 udalerrik parte hartu dute, eta 16k lortu dute zigilua. Azken neurketetan, herritarren parte-hartzea eta segurtasun juridikoa izan dira baloraziorik onena jaso duten atalak.