Klubak azaldu duenaren arabera, neurketan zehar harmailetatik "oihu matxista eta iraingarriak" entzun ziren. Gainera, Leioa WP-k azpimarratu du harmailetako kokapenak egoera larritu zuela, jokalarien bankuaren gainean baitzeuden, eta horrek hitzezko erasoak "jarraituak eta agerikoak" izatea eragin zuen.
Taldeak epaileen eta delegatu federatiboaren jarduna ere gogor kritikatu du. Izan ere, hirugarren zatian tentsioa areagotu zen eta jokalari batzuk harmailetara zuzendu behar izan ziren. Egoera horretan, Leioa WP-k epaile batek jokalari bati modu intimidatzailean hitz egin ziola dio, "begira iezadazu aurpegira hitz egiten dizudanean, edo hau azkartxo amaituko dut." esanez.
Klubaren esanetan, neurri bakarra ikusleetako pertsona bat kanporatzen saiatzeko egin zen, baina azkenean pertsona hori harmailetan geratu zen partida amaitu arte. Ondoren, laugarren zatian, epaileek bankuko jokalari guztiak kanporatzeko mehatxua egin zutela ere salatu dute.
Neurketa amaitutakoan, kapitaina eta ordezko atezaina mahaira hurbildu ziren gertatutakoa aktan jasotzeko asmoz. Leioa WP-ren arabera, delegatu federatiboak uko egin zion, "nik esaten dudalako eta punto" erantzunez. Klubak jarrera hori "arbitrario eta autoritarioa" dela adierazi du.
Leioa Waterpolok gertakariak "oso larritzat" jo ditu eta epaileen zein delegatu federatiboaren jarduna berrikustea eskatu du, baita halako egoerak berriro ez gertatzeko neurriak hartzea ere.