Eguneko ardatz nagusia AUSARTAK I. Martxa Solidarioa izango da, minbizia duten adingabeen errealitatea ikusarazteko eta haien familiei babesa adierazteko helburuagaz.
Martxa 11:00etan abiatuko da eta 3,47 kilometroko ibilbide erraza izango du, adin eta sasoi fisiko guztietako pertsonek parte hartu ahal izateko pentsatua. Ekimenak izaera ludikoa eta ez-lehiakorra izango du; hau da, ez da denborarik hartuko eta ez da sailkapenik ezarriko, helburua kausa solidario baten alde elkarregaz ibiltzea baita.
Antolatzaileek jakinarazi dutenez, izen-ematea dagoeneko zabalik dago parte hartu gura duten guztientzat. Martxan bildutako diru guztia Ausarta Zentroa proiektura bideratuko da; Aspanovas-ek sustatutako osasun integraleko espazio horrek Bizkaiko minbizia duten adingabeei eta haien familiei arreta fisikoa, emozionala eta soziala eskaintzea du helburu.
Martxaz gain, Ausarta Egunak jarduera osagarriak ere izango ditu: haurrentzako tailerrak, proposamen parte-hartzaileak, emanaldiak eta informazio guneak. Ekimen horien bidez, herritarrek Aspanovas-en lana gertutik ezagutzeko aukera izango dute, baita minbizia duten adingabeei eta haien familiei laguntza integrala ematearen garrantziaz jabetzekoa ere.