Zerbitzua hitzordurik gabe erabili ahal izango da. Laguntza behar duten herritarrek Errekalde plazako gunean jaso ahalko dute arreta astelehenetan, eguaztenetan eta barikuetan; Langileriakoan, berriz, martitzenetan eta eguenetan. Ordutegia ere herritarren beharretara egokituko da, goizez 9:30etik 14:00etara eta arrastiz 16:30etik 19:00etara eskainiko baita arreta pertsonalizatua.
Programaren hasierako faseetan, mugikorraren oinarrizko konfigurazioagaz eta aplikazioen instalazioagaz lotutako kontsultak izan ziren ohikoenak. Gaur egun, ordea, administrazio-izapideakaz lotutako galderak dira nagusi. Besteak beste, Gizarte Segurantzako tramiteak, online banku-kudeaketa edo Lanbide eta SEPEgaz lotutako prozedurak artatzen dituzte.
Udalak emandako datuen arabera, 868 pertsonak erabili dute zerbitzua aurreko faseetan. Erabiltzaileen artean, emakumeak %60 baino gehiago dira, eta batez besteko adina 60 urte ingurukoa da. Halaber, kasu gehienetan aurrez aurreko arreta lehenetsi dela nabarmendu dute.