Jardunaldia 11:00etan hasiko da, Ondalan Erraldoien Konpartsaren kalejiragaz. Erraldoiak eta gaitariak Udondoko Bulebarretik zein Iparragirre etorbidetik ibiliko dira. Eguerdian, 12:00etan, haurrentzako jolasak antolatuko dira, eta ordubete geroago, 13:00etan, Euskal Parrilla izeneko janari-gunea zabalduko da, bertaratzen direnek pintxoak eta bestelako jakiak dastatzeko aukera izan dezaten.
Arrastiko egitaraua 17:00etan hasiko da Egurre taldearen eskutik, musika eta dantza tradizionalagaz. 19:00etan, Tio Teronen Semeak taldeak ikuskizuna eskainiko du, eta 20:00etan Udondoko txikiteroek kaleak girotuko dituzte euskal abestiekin.
Eguna amaitzeko, 22:00etan, Lehian taldeak erromeria eskainiko du Ikea Barri plazan.
Antolatzaileek adierazi dutenez, helburua herritarrentzako topagune bat sortzea eta euskal ohiturak gertutik bizitzeko aukera eskaintzea da. Parte-hartzea irekia izango da, eta gura dutenak euskal jantzi tradizionalagaz joan daitezke.