Horregatik, Udalak dei zuzena egin die herritarrei urteurrenagaz bat egin dezaten, balkoi, terraza eta leihoak banderakaz apainduz eta ospakizunaren kamiseta ofiziala jantziz. Azken hori "Begitxu" izeneko urteurreneko furgonetaren bidez eskuratu ahal izango da, jarduera guztietan presente egongo baita.
Udalerriko espazio ezberdinak aktibatu gura dira, herritarren inplikazioa areagotuz eta auzoen arteko loturak indartuz.
Maiatzean bertan hasiko da jardueren lehen olatua, kaleak eta plazak hartuz. Dantza Plaza ekimenak euskal dantzak kalera aterako ditu Cervantes plazan, eta "Orainaren Begiradak" proiektu komunitarioak herritarren aurpegiak bilduko ditu udalerrian barrena, etorkizunean Leioaren irudi kolektiboa osatuko duen horma-irudi bihurtzeko. Hilabete berean amaituko da Leioako Artxibo Sekretuaren baitako kontakizun lehiaketa, eta "Begitxu" furgoneta Umore Azokagaz batera ibiliko da kalez kale, informazioa zabalduz eta herritarren parte-hartzea sustatuz. Maiatzaren amaieran, berriz, "Jaietako Begiradak" ekimenak Lamiakoko jaietara eramango du urteurrenaren espiritua, fotomatoi ibiltari baten bidez.
Sormena, memoria eta musika ekainaren ardatz
Ekaina sormenaren eta kulturaren hilabetea izango da. Errekaldeko baserrian egingo den Reading Light ekitaldiak Leioaren memoria emozionala ekarriko du lehen lerrora, giro intimo eta berezi batean. Handik gutxira, "Leioako Begiradak" erakusketak iragana ikuspegi bisualetik eskainiko du Lamiakon, eta ekainaren 19an aurkeztuko da "Orainaren Begiradak" horma-irudi komunitarioa, gaur egungo Leioaren isla kolektiboa. Musika zaleek ere hitzordu garrantzitsua izango dute hilaren 23an, tokiko taldeen lehiaketaren finalean, eta ekainaren amaieran "Zu zara Leioa" egitasmoak aste-akabu osoa beteko du kalejirak, herri kirolak, gastronomia eta topakagaz, auzoak dinamizatzeko asmoz.
Jai giroa eta parte-hartzea udan
Uda iristeagaz batera, jai giroak hartuko du protagonismoa. Uztailean eta abuztuan zehar, "Zure banderak saria dauka" ekimenak urteurreneko banderarekin apaindutako etxeak sarituko ditu astero, eta hitzaldi zikloak gizarte kohesioari buruzko gogoeta ekarriko du, kirolaren bidez komunitatea nola indartu aztertuz. Aldi berean, "Jaietako Begiradak" ekimenak auzoetako jaiak zeharkatzen jarraituko du abuztuan ere, eta udaren amaieran "Leioako Begiradak" erakusketak San Bartolomen egingo du geldialdia.