48 urteko leioaztarrak ibilbide luzea du udal politikagintzan, eta azken urteotan alkate karguan aritu da. Aurretik, besteak beste, Hirigintza, Etxebizitza, Mugikortasun eta Ingurumen arloetan zinegotzi eta alkateorde izan zen. Irakasle lanbidez, Claret Askartza ikastetxean jardundakoa da.
Rodriguez Etxebarriak azpimarratu du bere jardun politikoaren oinarrian gertutasuna eta entzute aktiboa daudela: "Politikak erabilgarria izan behar du, kalean egon behar da eta jendearen beharrei erantzun".
Proiektuak eta etorkizuneko erronkak
Azken legegintzaldian, hainbat proiektu nabarmen bultzatu direla azpimarratu du EAJk; hala nola Arrienako parkea, Lamiakoko Boulevard-a edo Lamiako-Txopoeta eremuko berroneratze plana. Horrez gain, beste administrazioagaz lankidetzan egindako ekimenen artean daude "La Avanzadaren" estaldura edo herriguneko institutu berriaren eraikuntza.
Aurrera begira, alkategaiak erronka nagusien artean aipatu ditu Pinuetako hirigintza-berroneratzea eta Torresoloko kiroldegiaren garapena, udalerriaren etorkizunerako giltzarri izango diren proiektuak.
Rodriguezek berak nabarmendu duenez, "Leioak aurrera egin du azken urteotan, baina ez gara konformatzen". Helburua, bere hitzetan, udalerri "modernoago, kohesionatuago eta pertsona guztientzat pentsatuago" bat eraikitzen jarraitzea da.