Artekaleren bultzadaz osatutako ekimenak sektoreko hainbat konpainia eta sortzaile bildu ditu. Sinatzaileen artean daude, besteak beste, Deabru Beltzak, HIKA Teatroa, AXUT!, Metrokoadroka, Eidabe edo Haatik Dantza. Guztiek ideia bera nabarmendu dute: euskarazko kaleko arteek "biziminez eta naturaltasunez" betetzen dituzte herri eta hirietako espazio publikoak.
Manifestuak azpimarratzen du azken urteetan gero eta gehiago direla euskaraz sortzen duten konpainiak, baina urrats gehiago behar direla. Horregatik, euskaraz lan egiten ez duten taldeei ere hizkuntza hautu hori egitera animatu diete. "Euskaraz sortzen dugun konpainien aldeko apustua biderkatzeko unea da", diote.
Kolektiboaren ustez, euskarak kalean irabazten du indarra. Hori dela eta, programazio publikoetan eta herrietako plazetan euskarazko ikuskizun gehiago egotea eskatu dute. "Hiri, herri, auzo eta plaza gehiago behar ditugu euskarazko kaleko arteentzat", aldarrikatu dute.
Baina mezua ez da erakundeetara bakarrik zuzendu. Herritarrei ere dei zuzena egin diete ikuskizunetara hurbiltzeko, euskarazko kulturaren biziraupenean publikoak duen garrantzia azpimarratuz: "Publikoaren beharra dugu. Elkarren beharra dugu".
Manifestuaren bidez, konpainiek argi utzi dute euskararen etorkizuna ere kalean jokatzen dela. Horregatik, herritarrak ikuskizunetara gerturatzera eta euskarazko kultur sorkuntza babestera gonbidatu dituzte. "Etorri, ikusi, geratu, gozatu eta gomendatu", diote sinatzaileek, euskarak plazetan, auzoetan eta herrietako eguneroko bizitzan gero eta leku handiagoa izan dezan.