Proiektuaren lehen fasean, proposamenak jasotzeko aldian, 400 ume eta gazte inguruk hartu zuten parte, eta guztira 1.000 ideia inguru helarazi zituzten. Ondoren, jasotako proposamenak bideragarritasun tekniko eta ekonomikoaren arabera aztertu dituzte, eta horietatik sei aukeratu dituzte bozketa-fasera igarotzeko.
Bozkatu ahal izango diren proposamenak honako hauek dira: Gabonetako Haur Parkea handitzea, Gazteguneko materiala hobetzea eta modernizatzea, pump track bat sortzea, Ondizen kirol-gune bat egitea, futbito-zelaia eta saskiakaz, zuhaitz-landaketa handitzea eta udalerrian ping-pong mahaiak jartzea.
Bozketa telematikoki egin ahal izango da, online formularioaren bidez, edo aurrez aurre. Horretarako, hautestontziak jarriko dituzte Kultur Leioan, Errekalde plazako ludotekan, Herritarrentzako Arreta Zerbitzuetan, Udalean eta Gaztelubiden, Kiroldegian eta Gaztegunean.
Leioako Udalak 200.000 euro bideratuko ditu babes gehien jasotzen duten eta bideragarriak diren proposamenak gauzatzeko. Ekimen irabazleak 2027ko Udal Aurrekontuen proiektuan sartuko dituzte, ondoren garatu ahal izateko.