Maskarada Txikia ez da ekitaldi huts bat izan. Eskolaren inguruan eraikitako harreman sarearen, kultur transmisioaren eta auzo-bizitzaren adierazpen bizia izan da. Haurrek euskal kulturagaz, antzerkiagaz, musikagaz eta dantzagaz duten lotura lantzeko aukera izan dute, eta familiek zein irakasleek ekimen kolektibo baten parte izateko modua aurkitu dute bertan.
Eskola baten itxierak ez du soilik eraikin baten amaiera esan gura. Ohiturak, topaguneak, ikasteko eta parte hartzeko moduak, auzoaren memoria eta belaunaldien arteko transmisioa ere ukitzen ditu. Maskarada Txikiak hori guztia bildu du urteotan.
Lamiako Eskolaren azken Maskarada Txikiak argi utzi du eskola bat ez dela ikasgela multzo bat bakarrik. Eskola bat auzoa ere bada, kultura eta memoria.
Laster arte, Maskarada Txiki!