Denboraldi-aurreko neurketa izango da, baina kirolaz harago doan esanahia izango du. Izan ere, Leioako Udalak Athleticen eta Lamiakoko auzoaren arteko lotura historikoa omendu gura du jardunaldi horren bidez. Lamiako Bizkaiko futbolaren hastapenakaz eta talde zuri-gorriaren lehen urratsakaz estu lotuta dago, eta ospakizunak memoria hori berreskuratzeko balioko du.
Partida Athletic Clubari eskainitako jai-egunaren ekitaldi nagusia izango da. Hala ere, ez da eguneko proposamen bakarra izango: Udalak herritar guztiei zuzendutako jarduerak prestatzen dihardu, eta programaren xehetasunak ekaineko azken astean emango dituzte ezagutzera.
Leioako alkate Iban Rodriguez Etxebarriak hitzorduak herriaren historiako atal garrantzitsu bat balioan jartzeko aukera emango duela nabarmendu du. Haren esanetan, Lamiakoren eta Athleticen arteko harremana Leioaren nortasunaren parte da, eta 500. urteurrena bezalako ospakizun berezi batean herritarrekaz partekatu gura dute.
Alkateak azpimarratu du, halaber, ez dela soilik kirol-ekitaldia izango, sustraiak aitortzeko eta etorkizunera begiratzeko jardunaldia ere izango dela, memoria kolektiboa eta kidetasun-sentimendua ardatz hartuta.